Шымкентте полицейлер жас келіншекті өлтірді деген күдікпен Түркістан облысының тұрғынын қамауға алды. Бұл туралы Шымкент қаласы полиция департаменті мәлімдеді.
Әл-Фараби АПБ-ның 102 арнасына жалға алынған пәтерлердің бірінен зорлық-зомбылық белгілері бар жас әйелдің мәйіті табылғаны туралы хабарлама келіп түсті.
Оқиға орнына дереу аудандық полиция басқармасының қызметкерлері, криминалистер, тергеушілер мен жедел уәкілдерден құралған Шымкент қаласы ПД-нің жедел-тергеу тобы шықты. Аудан прокурорлары да келді. Кезекші сарапшы жәбірленушінің механикалық асфиксия салдарынан қайтыс болуы мүмкін екенін анықтады. Бұл жайт ҚР ҚК 99-бабы «Адам өлтіру» бойынша тіркелді.
Пәтер иесі танысының айтуымен полицейлер жәбірленушінің жеке басын анықтады. Ол мегаполиске жұмыс іздеп келген 28 жастағы әйел болып шықты. Жасалған қылмыстың ауырлығын ескере отырып, тергеушілер мен жедел уәкілдер дереу күдіктіні іздеуге және оны ұстауға кірісті.
Бейнебақылау камераларының жазбаларын зерделеу кезінде кісі өлтіруге қатысы бар жас жігіт жедел уәкілдердің көзіне түсті. Ол 1994 жылы туған Түркістан облысының тұрғыны болып шықты. Осы азаматтың деректерімен бірден барлық бөлімшелерге бағдарлар жіберілді. Нәтижесінде, Шымкент қаласының криминалдық полиция қызметкерлері күдіктіні Жетісай ауданында тұрғылықты жерінде ұстады.
Күдікті қамауға алынды. Оған қатысты сотқа дейінгі тергеу жүргізілуде. Сараптама тағайындалды. Тергеушілер жасалған қылмыстың себебін анықтап жатыр.
Шымкент қаласы
