Бұл туралы “Астарлы ақиқат” ақпарат агенттігі жариялады Фуцзянь провинциясының төтенше жағдайлар басқармасына сілтеме жасап.
Фуцзянь су тасқынына байланысты төтенше әрекет ету деңгейін II деңгейге көтерді.
Бүгін Фуцзянь провинциясының жағалау және оңтүстік аудандарында нөсер жауын жауады. Чжанчжоу, Сямэнь, Цюаньчжоу және Ниндэ қалаларының басым бөлігінде, сондай-ақ Лунъянь қаласының Чжанпин, Синьло және Юндин аудандарында өте қатты жауын, кей жерлерде аса күшті нөсер күтіледі.
24 сағат ішінде жауын-шашын мөлшері 80–180 мм, жекелеген жерлерде 300 мм-ге дейін жетуі мүмкін. Бір сағаттағы ең жоғары жауын-шашын мөлшері 120 мм болуы ықтимал.
Биылғы №18 «Саудел» (沙德尔) тайфунының орталығы 2 қыркүйек сағат 10:00-дегі жағдай бойынша Гуандун провинциясының Шаньвэй қаласынан шығыс-оңтүстік-шығысқа қарай шамамен 200 шақырым жерде орналасқан. Тайфун орталығындағы ең жоғары жел күші — 8 балл, яғни тропикалық дауыл деңгейінде. Ол сағатына шамамен 10 шақырым жылдамдықпен шығыс-солтүстік-шығыс бағытында қозғалады.
Фуцзянь метеорологиялық орталығы 2 қыркүйек сағат 11:00-де нөсер жауынға байланысты ескертуді ең жоғары I деңгейге көтерді, ал тайфунға байланысты IV деңгейлі ескертуді күшінде қалдырды.
Осыған байланысты Фуцзянь провинциясының су тасқынына қарсы күрес штабы су тасқынына байланысты төтенше әрекет ету режимін II деңгейге көтеріп, тайфунға байланысты IV деңгейлі әрекет ету режимін сақтап қалды.
Жергілікті билік органдарына жауын-шашынның жағдайын үздіксіз бақылау, су тасқыны мен одан туындайтын апаттардың қаупін бағалау және қауіпті аймақтардағы тұрғындарды дер кезінде эвакуациялау тапсырылды.
