24 жастағы ер адам есірткіге мас күйінде мотоцикл жүргізген. Бұл туралы Алматы қаласы полиция департаменті хабарлады.
Тимирязев пен Жароков көшелерінің қиылысында «Буран-126» патрульдік экипажы апаттық жағдай жасаған мотоциклшіні байқап қалған.
Тәртіп сақшыларының тоқта деген заңды талаптарына бағынбаған жас жігіт қашып кетпек болған.
Алайда, бекер.
Патрульдік қызметкерлер оны Левитан көшесінде тоқтатты.
«Мотоциклшінің мінез-құлқы жол қозғалысына қатысушылар үшін өте қауіпті болды. Медициналық сараптама оның есірткіге мас болғанын анықтады. Құқық бұзушы көлік құралын басқарудан айырылып, ҚР ӘҚбК-нің 608 бабы 6 бөлімі (КҚ басқаруға құқығы жоқ адамның есірткіге мас күйінде көлік құралын басқаруы), ҚР ӘҚбК-нің 596 бабы 5 бөлігі (көлік құралының жолдың жүріс бөлігінде орналасуы, қарама-қарсы келе жатқан қозғалыс бөлігі немесе басып озу ережелерін бұзуы), ҚР ӘҚбК-нің 606 бабы 1 бөлігі (жол қозғалысына қатысушының апаттық жағдайдың туындауына әкеп соққан жол жүру ережесін бұзуы), ҚР ӘҚбК-нің 613 бабы 1 бөлігі (ішкі істер органы қызметкерінің талаптарын орындамауы), ҚР ӘҚбК-нің 230 бабы 1 бөлігі (Қазақстан Республикасының міндетті сақтандыру туралы заңнамасын бұзуы) бойынша әкімшілік жауапкершілікке тартылды», — деді, Алматы қалалық ПД жергілікті полиция қызметі Басқармасының бастығы, полиция полковнигі Ержан Ұзабаев.
Ол сондай-ақ, шешім қабылдау үшін өндіріс материалдары Алматы қаласы бойынша мамандандырылған ауданаралық әкімшілік сотына жіберілетінін айтты.
Екі доңғалақты көлік айыппұл тұрағына қойылды.
Алматы қаласы
