Түркістан полицейлері егістік алқабына кіріп кеткен тұрғынның жылқысын темірмен ұрып өлтірді деген күдікпен ер азаматты ұстады. Бұл туралы Түркістан облысы полиция департаментінің баспасөз қызметі мәлімдеді.
Шардара аудандық ПБ-ға жергілікті тұрғын арызданды. Оның айтуынша белгісіз азаматтың өзіне тиесілі 1 бас биесін белгісіз затпен ұрып өлтіріп қойғанын көрсеткен. Жәбірленушіге келтірілген шығынның көлемі 1 миллион теңге. Аталған жайтты полицейлер ҚК-нің 202-бабы « Бөтеннің мүлкiн қасақана жою немесе бүлдiру» бойынша СДТБТ-ға тіркеді. Осыдан соң полицейлер бірден оқиға орнына шығып, тиісті тексеру жұмыстарын жүргізді.
Нәтижесінде Шардара АПБ полицейлері 1 бас жылқыны өлтірді деген күдікпен ер азаматты ұстады. Ер азамат жергілікті тұрғын болып шықты.
Белгілі болғандай жәбірленушінің жылқысы күдікті азаматтың егістік алқабына кіріп кетіп, едәуір шығын келтірген. Сондай-ақ күдіктіден жылқыны ұрып соққан темірді тәркілеп алды. Қазіргі уақытта аталған жайтқа байланысты сотқа дейінгі тергеу амалдары жүргізілуде. Сараптамалар тағайындалды. Оқиғаның толық мән-жайы тергеу барысында анықталатын болады.
Өз кезегінде Түркістан облысының полицейлері азаматтарға төрт түлікке ие болуды ескертеді. Сондай-ақ заңға қайшы іс-әрекеттерді жасамауға, туындаған мәселелерді заң аясында шешуге шақырады. Егер, сіз, заңсыз әрекеттердің құрбаны немесе куәсі болсаңыз, тез арада «102» телефонына хабарласыңыз.
Түркістан облысы