Аудан әкімі аппаратының басшысы бюджет қаражатын жымқыруды көздеген. Бұл туралы «Астарлы ақиқат» ақпарат агенттігі жариялады Шымкент қаласы сотына сілтеме жасап.
Шымкент қаласының ауданаралық қылмыстық сотында М.-ға қатысты аса ірі мөлшерде сеніп тапсырылған мүлікті топ адаммен алдын ала сөз байласу арқылы қызмет бабын пайдалана отырып ысырап ету (ҚК-нің 189-бабы 4-бөлігі 2-тармағы) және К. мен Б.-ға аса ірі мөлшерде бөтеннің мүлкін топ адаммен ұрлау, аса ірі мөлшерде салық төлеуден жалтару және құжаттарды қолдан жасау (ҚК-нің 189-бабы 4-бөлігі 2-тармағы), 28-бабы 3-бөлігі — 245-бабы 2-бөлігі 1, 2-тармақтары), 385-бабы 2,3-бөліктері) фактісі бойынша қылмыстық іс қаралды.
Сот 2019 жылы Шымкент қаласы Әл-Фараби ауданы әкімі аппаратының басшысы М. өз қызметтік жағдайын пайдалана отырып, алдын ала сөз байласу арқылы ЖШС директоры Б. және құрылтайшысы К. бірге қылмыстық мақсатта әкімдіктің бюджет қаражатын жымқыруды көздегенін анықтады.
Олар тұрғын үй аулаларын абаттандыруға арналған сметалық құжаттарды (қоқыс жәшіктері, шағын беседкалар, орындықтар, ойын және жаттығу алаңдары) материалдардың құнын асыра отырып әзірлеу арқылы шамамен 700 млн теңге көлемінде сеніп тапсырылған мүлікті ысырап еткен.
Өз кезегінде, К. ұйымдастырушы ретінде Б.-мен бірге декларацияларға әдейі бұрмаланған деректерді енгізу арқылы салық төлеуден жалтаруды ұйымдастырып, мемлекетке 194 млн теңгеден астам зиян келтірген.
Сот жеңілдететін мән-жайларды ескере отырып – кәмелетке толмаған балаларының болуына байланысты, әрқайсысына қылмыстық құқық бұзушылықтардың жиынтығы бойынша 8 жыл бас бостандығынан айыру жазасын тағайындап, М.-ны өмір бойына мемлекеттік қызметте лауазымдарды атқару құқығынан айырды.
Сондай-ақ, Б. ҚК-нің 385-бабының 3-бөлігі бойынша қылмыстық жауапкершіліктен ескіру мерзімінің өтуіне байланысты босатылды, қылмыстық іс бұл бөлікте тоқтатылды.
Сот үкімі заңды күшіне енген жоқ.
Шымкент қаласы
