2026 жылғы 10 тамызда Республикалық заң консультанттары алқасы Астана қаласының заң консультанттары Палатасымен бірлесіп, «Әкімшілік рәсімдер: Қазақстан Республикасының ӘРПК-ін қолданудың өзекті мәселелері» атты алғашқы ғылыми-практикалық конференция өткізді.
Конференция Қазақстан Республикасының Әкімшілік рәсімдік-процестік кодексінің қолданысқа енгізілгеніне бес жыл толуына орайластырылып, әкімшілік рәсімдерді қолданудың өзекті мәселелерін талқылауға арналған кәсіби алаңға айналды.
Іс-шараға онлайн форматта сот жүйесінің, мемлекеттік органдардың, адвокатураның және заң қоғамдастығының 100-ге жуық өкілі қатысты.
Конференция қатысушыларына Республикалық заң консультанттары алқасының төрағасы Серік Ақылбай алғы сөз арнады.
Өз сөзінде ол Қазақстанда әкімшілік әділетті дамытудағы ӘРПК-нің маңызын атап өтіп, бес жыл ішінде әкімшілік әділеттің ұлттық құқықтық жүйенің ажырамас бөлігіне айналғанын, ал Кодекстің мемлекетпен қарым-қатынаста азаматтар мен бизнестің құқықтарын қорғаудың маңызды құралы болып қалыптасқанын атап өтті.
Конференция аясында сот жүйесінің, мемлекеттік органдардың және заң қоғамдастығының өкілдері сөз сөйледі.
Астана қаласы сотының әкімшілік істер жөніндегі сот алқасының судьясы, PhD докторы Айым Шаяхметова мемлекеттік органдар басшылары мен олардың орынбасарларының азаматтарды жеке қабылдау рәсімдерін сақтау мәселелерін, сондай-ақ ҚР ӘРПК-нің 90-бабын қолдану тәжірибесін қарастырды.
Астана қаласының мамандандырылған ауданаралық әкімшілік сотының судьясы Айбек Амангелдин «Әкімшілік әділет: енгізілгенге дейін және кейін» тақырыбында баяндама жасады.
Мемлекеттік органдардың өкілдері өз баяндамаларында ӘРПК-ні мемлекеттік органдар қызметінің жекелеген салаларында қолданудың практикалық мәселелеріне тоқталды.
ҚР Экология және табиғи ресурстар министрлігі Экологиялық реттеу және бақылау комитетінің Құқықтық қамтамасыз ету басқармасының бас сарапшысы Айгуль Ахметова экологиялық дауларда, атап айтқанда, тексерулерді тоқтата тұру кезінде ҚР ӘРПК-нің 96-бабын қолдану ерекшеліктері туралы айтып берді.
Қаржылық мониторинг субъектілерімен жұмыс департаменті SFM2 басқармасының бас консультанты Дінмұхамед Әбілсейіт қаржылық мониторинг субъектілерінің өтініштерін қарау кезінде ӘРПК-ні қолдану тәжірибесін таныстырды.
Әкімшілік рәсімдерді сақтау мәселелеріне және оларды бұзудың салдарына ерекше назар аударылды.
«Жеке практикамен айналысатын Заң консультанттары орталығы» заң консультанттары палатасының мүшесі Лаура Нұржігітова мемлекеттік орган актісінің күшін жоюға негіз болатын ӘРПК рәсімдерінің бұзылуы туралы баяндама жасады.
Конференция барысында қатысушылар спикерлерге сұрақтар қойып, әкімшілік заңнаманы қолданудың өзекті мәселелерін кәсіби талқылауға қатысты.
Конференцияны қорытындылай келе, іс-шараның модераторы – Астана қаласының заң консультанттары палатасының төрағасы Ануарбек Скаков осындай кәсіби алаңдардың маңыздылығы мен сұранысқа ие екенін атап өтіп, ғылыми-практикалық іс-шараларды өткізуді жалғастыру жоспарлары туралы хабарлады.
Алғашқы ғылыми-практикалық конференция сот жүйесі, мемлекеттік органдар және заң қоғамдастығы өкілдері арасындағы ашық кәсіби диалог, практикалық тәжірибе алмасу және Қазақстан Республикасындағы әкімшілік рәсімдерді одан әрі жетілдіру үшін маңызы бар мәселелерді талқылау алаңына айналды.
