Жол апатын жасап, кетіп қалған погонды сотталды. Бұл туралы «Астарлы ақиқат» ақпарат агенттігі жариялады.
Ақтөбе облысының қылмыстық істер жөніндегі мамандандырылған ауданаралық сотында алкогольдік масаң күйде көлік құралдарын басқара отырып абайсызда 2 адамның өліміне әкеліп соқты және оқиға болған жерден кетіп қалды деген айыппен, С.-ға, ҚР ҚК-нің 345-1-бабының 4-бөлігі, 347-бабы мен тағылған айып бойынша сот үкімі жарияланды.
Сотта анықталғандай, 2024 жылдың шілде айында сотталушы С., спирттік ішімдік ішкен күйде, «Kia Sportage» маркалы автокөлігін «Ақтөбе-Ақжар» тас жолы бойымен 121 км жылдамдықпен басқарып келе жатып, Ақжар-1 ауылы маңында бір бағытта жол бойымен жүріп бара жатқан велосипед жүргізішісі К. мен оның қасында отырған Н.-ді соғып, жол-көлік оқиғасын жасап, нәтижесінде абайсызда олардың өліміне әкеліп соқтырған. Осыдан кейін сотталушы С. жол-көлік оқиғасынан ауыр зардаптар келгенін біліп, жәбірленушілерге ешқандай көмек көрсетпей, полиция бөліміне хабарламай, қылмыстық жауапкершіліктен құтылу мақсатымен қасақана жол-көлiк оқиғасы болған жерден кетіп қалған.
Сот қылмыстық жаза тағайындау кезінде сотталушының қылмыстық жауаптылық пен жазасын жеңілдететін мән-жайлар ретінде оның бұрын сотталмағанын, жас балаларының барын ескере отырып, сотталушы С. кінәлі деп таныды. Оған өмір бойына көлік құралын басқару құқығынан айыра отырып, 9 жылға бас бостандығынан айыру жазасы тағайындалды.
ҚР ҚК-нің 49-бабының 1-бөлігіне сәйкес сотталушы полиция майоры шенінен айырылды.
Сот үкімі заңды күшіне енген жоқ.
Ақтөбе облысы